ماذا تعرف عن نفسك ؟

whoami

اليوم كنت أتكلم مع واحد من الشباب، وسألتو: تحب حسنين طه ؟
قلي: ومين حسنين طه ؟
قلتلو: لا تجاوب على سؤالي بسؤال. هل تحب حسنين طه ؟
قالي: والله لا! يعني عادي لا أحبه ولا أكرهه.
قلتلو: وليش ؟
قال: ما أعرفو !

قلتلو: طيب تحب نفسك ؟
قال: أكيد !

قلتلو: طيب أيش تعرف عن نفسك ؟
قال: عن نفسي؟!

قلتلو: إيوا ! مو إنتا بتقول إنك تحب نفسك، وبحسب قاعدتك عن حسنين طه، وإنك ما تحب إلا إللي تعرفو فعرفني بنفسك ؟

طبعاً المسألة قلبت ضحك.. لإنو صار مو عارف أيش يقول..

قالي: أنا إنسان ..
قتلتو: حلو.. ممتاز..
بعدين كمل وقال… إنسان … إنسان..

طبعاً أنا انفك عليَّ ضحك، ما قدرت أمسك نفسي من الضحك، حتى دمعت عيوني..
صديقي دا دمو خفيف، عشان كدا الحوار مشي بدي الطريقة الفكاهية..

قالي: شوف يا حبيبي أنا عمري ٢٢ سنة، واكتشفت بعد ٢٢ سنة إني بس إنسان.. هههههه

قالي: اسمع.. اسمع.. وشيء ثاني: إني مهندس…

قعدنا نضحك،، وقلتلو: لا تتوقع إني بأسأل السؤال دا استهتاراً بيك أو استهزاءً.
أنا نفسي ما أعرف نفسي، بس قاعد أفضفض لك..

بعدين قلتلو: إزا كنت ما تحب نفسك؟ كيف تبغى تقعد معاها؟
قلي: كيف يعني؟ الإنسان يا مرثد كائن اجتماعي.. لازم يقعد مع الناس..

قلتلو صح.. بس لمن تكون قاعد لوحدك مع نفسك، وتغمض عينيك، تشعر بالسعادة؟؟
قلي: يا أخي لازم تكون قاعد مع أحد، أو في شيء معاك جوالك، كتابك..أي حاجة!

قتلتو: دحين إنتا خطيبتك ليش تشعر بالسعادة لمن تقعد معاها ؟
قال: ليش؟ لأني أحبها طبعاً..

قلتلو: إذن إنتا ما بتقدر تقعد مع نفسك، لإنك ما تحبها..
قالي: مممم! يمكن والله، قد يكون،، وارد دا الكلام..

قلتلو: يا حبيبي أنا هنا ما بأنتقد، ولا بأستهزئ، أنا هنا بأفضفض.. أكتشفت أنا قريباً، إني ما أحب نفسي، وعشان كدا ما أقدر أقعد مع نفسي لوحدي وأشعر بالسعادة.

وبعدين دخلنا في شيء من أحاديث النبي ﷺ وقد أيش هو ﷺ كان يحب نفسه؟ وليش كان يتحنث في الغار عشان التأمل meditation وأحاديث نبوية أخرى.

قلتلو: يا حبيبي، أنا أظن إنو السعادة لمن تقعد مع نفسك، بدون جوال، ولا كتاب، ولا نت، ولا أي تلفيزيون، ولا أي ملهي آخر، وتحس من جد إنك مبسوط..

ودا مو شيء سهل.. قلتلو: أنا عرفت المعلومة دي ( إنك لازم تحب نفسك قبل سنتين )، واشتغلت على نفسي خلال السنتين دي، وكنت أظن إني دحين خلاص، وصلت لمرحلة متقدمة في حب النفس، يعني قلتلو: كنت أحس إني مثلاً وصلت لـ ٥٠٪..

قلتلو: وقبل كم يوم اكتشفت إني في حب نفسي لساعي في -١٠٪ ههههه
يعني: لساعي حتى حبي لنفسي بالماينص ( بالسلبي يعني ).. ههههه

وبعدين ضحكت، وقلتو: بس ترى نعمة! إذا دحين -١٠٪، أجل أكيد قبل سنتين كنت -٤٠٪ ههههه

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s